ჩვენ ვყიდულობთ საქართველოში წარმოებულ ხარისხიან პროდუქციას. რატომ? 1) გადახდილი ფულით ხელფასს ვუხდით საქართველოს მოქალაქეს, 2) ვავითარებთ ადგილობრივ წარმოებას და 3) ვაძლიერებთ საქართველოს!
ბიზნეს გეგმის დაფინანსების გარანტია

ბიზნეს გეგმის დაფინანსების გარანტია შეგიძლიათ მომცეთ?

მცირე მეწარმე, რომელიც რომელიმე კონკურსისთვის ბიზნეს გეგმის როგორმე დასაწერად “ნემსის ყუნწში ცდილობს გაძრომას”, ცხადია სვამს შეკითხვას: ბიზნეს გეგმის დაფინანსების გარანტია შეგიძლიათ მომცეთ?

სათაურში დასმული შეკითხვა ხშირად დაუსვამთ ჩემთვის.

პასუხი ყოველთვის არის პირდაპირი და ცალსახა:

ა რ ა ნ ა ი რ ი !

და ხმის ტონალობაშივე ვგრძნობ ადამიანის იმედგაცრუებას!

ბევრჯერ ამ იმედგაცრუების შემდეგ დავწერე ეს კონკრეტული ახსნა განმარტებითი სტატია და მომზადებული მაქვს ხოლმე ბმული მისაწერად.

3 მიზეზს გეტყვით თუ რატომ ვერ იქნება “სუპერ” ბიზნეს გეგმაც კი რომელიმე კონკურსში გამარჯვების 100 % გარანტი.

1. ბიზნეს გეგმის პროფესიონალურად დაწერა ცალკე საქმეა და ამ საქმეს თავისი წესები აქვს

ბიზნეს გეგმას რა მოტივაციით შეადგენთ, დაწერთ თავად, თუ შეუკვეთთ ვინმეს, ეს თქვენი საქმეა, მაგრამ ნებისმიერ შემთხვევაში სულ სხვაა ბიზნეს გეგმის დაწერის პროცესი და სულ სხვაა რა მოხდება მერე.

სხვა თანაბარ პირობებში (ამას ხაზს ვუსვამ), რაც მეტად პროფესიონალურადაა შედგენილი ბიზნეს გეგმა, მით მეტია ნებისმიერ კონკურსში გამარჯვების შანსი (ეს შანსი მაქსიმუმ 50% შეადგენს)!

და ამ მხარეს თქვენ აკონტროლებთ! ან დაწერთ თავად და შანსი გექნებათ 1%, ან დაიხმართ პროფესიონალს და შანსები მიუახლოვდება 50 %.

2. მეორე 50% თქვენს კონტროლს მიღმაა!

ნებისმიერ კონკურსში მონაწილე უამრავ კონკურენტს შორის ერთ-ერთი შეიძლება იყოთ თქვენც.

მაგრამ თქვენს გამარჯვებაზე “ხარისხიანი” ბიზნეს გეგმის გარდა უამრავი სხვა ისეთი ფაქტორი მოქმედებს, რომლებზედაც თქვენ შეიძლება წარმოდგენაც კი არ გექნეთ.

შეიძლება პროექტის მენეჯერმა ვერ წარადგინა კარგად, ან კომისიაზე გადაღლილებმა განიხილეს თქვენი თემა და სათანადო ყურადღება არ მიაქციეს, ან შეიძლება ისეთი “ბუკეტი” გადაწყვიტეს (გინდა, არ გინდა ეს ყოველთვისაა), სადაც თქვენი თემის ადგილი არ მოიძებნა, ან შეიძლება თქვენი პროექტი მაგარი იყო, მაგრამ ქულები არ ეყო, ან სულაც შეიძლება საკითხი “წინასწარ იყო გადაწყვეტილი” და ა.შ.

და ეს “ბნელი” მხარე მთლიანად თქვენს კონტროლს მიღმა იმყოფება!

მქონია შემთხვევა, რომ ბიზნეს გეგმა იყო სუპერ, მაგრამ სესხი მაინც არ მისცეს წარმოებას გაფართოებაზე. რატომ? იმდენი ჰქონდა სესხი უკვე აღებული, რომ ყოველგვარი ლიმიტი ამოწურული ჰქონდა.

რა ბიზნეს გეგმის დამწერის ბრალია, თუ თავად წარმოებას აქვს სხვა ტიპის პრობლემა?

3. თუნდაც გაიმარჯვოთ, სანამ ფულს მოგცემენ როგორც წესი კიდევ ერთ “ცხრილში” გაგატარებენ

შეიძლება პრეზენტაცია გაგაკეთებინონ, შეიძლება ადგილზე გესტუმრონ, შეიძლება რაღაც დამატებითი ინფორმაცია მოგატანინონ.

აქ კი თავად უნდა ივარგოთ, თქვენმა პიროვნებამ, საქმის აწყობის ხარისხმა და ბევრმა უშუალოდ თქვენზე დამოკიდებულმა ფაქტორმა უნდა გააკეთოს თავისი.

როგორც წესი ეს გასაუბრების ეტაპია. და უნდა აქ დაამტკიცოს ბიზნესის წარმომადგენელმა, რომ მისთივს ფულის მიცემას აქვს აზრი.

რა გარანტია მაქვს რომ დამაფინანსებენ? არანაირი!

ბიზნეს გეგმის დაფინანსების გარანტია – ასეთი რამ ბუნებაში არ არსებობს.

ნებისმიერი, ვინც კი გეტყვით, რომ მოდი მე შენ დაგიწერ ბიზნეს გეგმას და გარანტიას გაძლევ, რომ კონკურსში 100% გაიმარჯვებ, მწარედ გატყუებთ!

თუ გარანტია არ მაქვს, რატომ გადავიხადო ფული ბიზნეს გეგმის შესრულებაში?

ნუ გადაიხდით, თავად იწვალეთ!

და ამ შემთხვევაშიც თქვენი “გამარჯვების” შანსი 50%-ს მაინც ვერ აცილდება.

ოღონდ თქვენი ნაწვალევის შანსი იქნება 1 %, სპეციალისტის დახმარებით დაკეთებულის კი 50%-თან მიახლოებული.