1 ლარით გაბრწყინებული იბერია …

რაოდენ მომხიბლავიც არ უნდა იყოს კარგი ქართული საქმის კეთების იდეა, რაც არ უნდა ყიდულობდე მხოლოდ ქართული წარმოების პროდუქციას, მაინც გინდა ადამიანს საერთო საქმეში შენი წვლილის რიცხვებში დანახვა. ამიტომაც დღეს გადავწყვიტე შენ, რაციონალურად მოაზროვნე მყიდველს ციფრებში დაგანახო “რა სარგებლობა მოაქვს მამალს” (და რომ ორნიშნა ეკონომიკური ზრდა რეალურად მიღწევადია).

დავუშვათ ხელში გიჭირავს 1 ლარი და გინდა გადაწყვიტო ქართულ პროდუქტში დახარჯო თუ იმპორტირებულში; მაგალითად სნიკერსი იყიდო, თუ ბარამბოს შოკოლადი. მოდით დავთვალოთ რომლის ყიდვას როგორი ეფექტი აქვს.

ნახე ცხრილი ?

1. მარცხნივ მოცემულია რა ხდება როცა იძენ იმპორტირებულს, მარჯვნივ კი როცა იძენ ქართულს;
2. “დრენაჟი” მიუთითებს, რომ ეს ოდენობის თანხა “გაიწრიტა” საქართველოს ეკონომიკიდან საზღვარგარეთ. “დოვლათი” მიუთითებს თანხას, რომელიც შეიქმნა და ამოძრავდა ქვეყანაში;
3. 20/80 წესის იდეა ისაა, რომ მაგალითად იმპორტირებული პროდუქტის შეძენისას შენს მიერ გადახდილი თანხიდან დაახლოებით 20% ხმარდება ჩვენს ქვეყანას, დანარჩენი 80% კი გაედინება. ქართული პროდუქტის შეძენისას კი პირიქით [ეს თანაფარდობა ცხადია ცვალებადია პროდუქტების მიხედვით. აქ მიზანი არის მხოლოდ ლოგიკის დემონსტრაცია];
4. რაუნდი #1 ნიშნავს, რომ მოხდა პირველი შესყიდვა [დავუშვათ შენ იყიდე ქართული შოკოლადი]; რაუნდი #2 ნიშნავს, რომ მოხდა მეორე შესყიდვა [დავუშვათ იმან, ვინც შენს მიერ ქართული შოკოლადის შესყიდვისას გადახდილი ფული შემოსავლად მიიღო, ისევ ქართულ პროდუქტში დახარჯა] და ა.შ.
5. წითელ კუბიკში ჩაწერილი 14.44 რას ნიშნავს იხილე მთავარ დასკვნაში ქვემოთ;

დასკვნები

დასკვნა [1]: თუ იმ 1 ლარს დახარჯავ სნიკერსში [მარცხენა სვეტი], შესყიდვის სამი რაუნდის შედეგად შენი და სხვათა [ვინც იმპორტულს ყიდულობს] “დამსახურებით” ჯამში ქვეყნიდან უმალ გაიწრიტება 0,99 ლარი, ხოლო ქვეყანაში მხოლოდ 0,25 ლარის დოვლათი შეიქმნება;

დასკვნა [2]: თუ იმ 1 ლარს დახარჯავ ბარამბოს შოკოლადში [მარჯვენა სვეტი], შესყიდვის 10 რაუნდის შედეგად შენი და სხვათა [ვინც ქართულს ყიდულობს] დამსახურებით ჯამში ქვეყნიდან გაიწრიტება სულ რაღაც 0,89 ლარი, ხოლო ქვეყანაში 3,58 ლარის დოვლათი შეიქმნება, დარჩება, იმოძრავებს და “იბარტყებს”;

მთავარი დასკვნა: დღეში რამოდენიმეჯერ, თუნდაც 1 [ერთი] ლარის დახარჯვის მყიდველობითი გადაწყვეტილების მიღებისას შენს ხელშია ორი მნიშვნელოვანი ალტერნატივა: 1) ან იყიდო იმპორტული და ქვეყნის ეკონომიკაში პოტენციურად 25 თეთრის დოვლათი შექმნა, ან 2) იყიდო ქართული წარმოების პროდუქტი და ქვეყნის ეკონომიკაში პოტენციურად 14.44-ჯერ მეტი [3,58 ლარი] დოვლათის შექმნას შეუწყო ხელი;

ეფექტი?

როგორ აძლიერებს ეს “ლარიანი  გადაწყვეტილება” ქართულ სახელმწიფოს? როცა ქვეყანაში ფული რჩება, გარეთ არ გაიწრიტება და თან “ბარტყობს”, ბიუჯეტში შესული მეტი გადასახადით, მეტად განვითარებული ინფრასტრუქტურით, მეტი სოციალური პროგრამების დაფინანსებით, ეროვნული ვალუტის მეტად გაძლიერებით და ა.შ. ქვეყანა ძლიერება, ეკონომიკური ზრდა მაღალია, შიდა ბაზარი იზრდება და უფრო მიმზიდველი ხდება ინვესტიციების და ა.შ. მრავალი კუთხით.

როგორ აძლიერებს ეს “ლარიანი  გადაწყვეტილება” ადგილობრივ წარმოებას? როცა შიგა ბაზარზე ადგილობრივად წარმოებული პროდუქციის რაოდენობა იყიდება, ბაზარი ვითარდება, მწარმოებელი ფესვებს იმაგრებს და ვითარდება, მასშტაბს ზრდის (ამ დროს თვითღირებულება მცირდება), ხარისხს აუმჯობესებს, ასორტიმენტს ზრდის, ექსპორტს ზრდის, რაც მეტი ადამიანის დასაქმებას იწვევს, მეტი ამ ქვეყნის მოქალაქე იღებს მეტ შემოსავალს, ბიზნესის თავისუფლების ხარისხს ზრდის, რაც ყოველმხრივ დადებითი მოვლენაა. აღარ ვსაუბრობ გაზრდილ კონკურენციაზე, რომელიც ფასებს ავტომატურად ჩამოსწევს ქვემოთ.

როგორ აისახება ეს “ლარიანი  გადაწყვეტილება” კონკრეტულად შენზე? როცა ძლიერ და პერსპექტიულ ქვეყანაში ცხოვრობ, სადაც ეკონომიკური ზრდა ორნიშნაა, როცა შემოსავალი გეზრდება, როცა ბიზნესის დაწყება თამამად შეგიძლია იმიტომ რომ გარემო და საზოგადოება მხარს გიჭერს, როცა ახლობლებისათვის მეტის გაკეთება შეგიძლია, როცა ქვეყნიდან ხალხი კი არ გარბის, არამედ უკან ბრუნდება, განა ამაზე კარგი შენთვის რა შეიძლება იყოს?

მეგა დასკვნა

საქართველოს ყველა მოქალაქემ დღეში 1 ლარი რომ გადაამისამართოს [ანუ, იმპორტირებულის ყიდვას აპირებდა და ქართული იყიდა], წელიწადში ეს გამოვა 3,730,000 * 365 = 1,361,450,000 [მილიარდზე მეტი] ლარის გადამისამართება [თან იმპორტის შემცირების ხარჯზე]. ეს ინვესტიცია ეროვნულ ეკონომიკაში ჩვენი ზემო კალკულაციის თანახმად შექმნის დაახლოებით 4,873,991,000 [თითქმის 5 მილიარდი] ლარის დოვლათს. საქართველოს მთლიანი შიდა პროდუქტის მოცულობა 2019 წელს (მიმდინარე ფასებში) თითქმის 50 მილიარდი ლარი იყო. ეს კი იმას ნიშნავს, რომ თითქმის 10 % ეკონომიკური ზრდა მარტო ლარიანის “გადამისამართებით” შეგვიძლია მივიღოთ. შედეგად კი რამოდენიმე წელიწადში ჩვენი მოხუცების მოსავლელად რიგში დადგებიან ბერძენი, ესპანელი, ამერიკელი, თურქი და ა.შ. ქალბატონები!

იბერიის გაბრწყინება მხოლოდ მითი არ არის ჩემი კარგებო!
იგი რეალურად “ლარიანის გადამისამართებით” იწყება!

PS 1

? 12 წუთიან ვიდეო გამოსვლაში სწორედ ამ თემაზე ვსაუბრობ. გამოსვლა შედგა 2016 წლის 8 აპრილს Business Georgia-ს, GITA-ს და მსოფლიო ბანკის მიერ ორგანიზებულ ღონისძიებაზე – “ინოვაცია და ციფრული ეკონომიკა”.

PS 2

სტატია პირველად გამოქვეყნდა 2015 წლის 13 აპრილს.

სტატიაში მოცემული სტატისტიკა ბოლოს გაახლდა 2020 წლის 14 ივნისს.