ჩვენ ვყიდულობთ საქართველოში წარმოებულ ხარისხიან პროდუქციას. რატომ? 1) გადახდილი ფულით ხელფასს ვუხდით საქართველოს მოქალაქეს, 2) ვავითარებთ ადგილობრივ წარმოებას და 3) ვაძლიერებთ საქართველოს!
მთავარი > ბიზნეს გეგმა > რა ცოდნა & უნარები სჭირდება ბიზნეს გეგმის დაწერას?

რა ცოდნა & უნარები სჭირდება ბიზნეს გეგმის დაწერას?

საკითხში ჩაუხედავთ ბიზნეს გეგმის დაწერა “ყველი და პურის ჭამა” ჰგონიათ. ქვემოთ სტატიაში ჩემი 22+ წლიანი პრაქტიკული გამოცდილების საფუძველზე აგიხსნით რა სჭირდება თქვენი გზააბნეული აზრების ადამიანისთვის გასაგებ ენაზე ბიზნეს გეგმის სახით დალაგებას.

[პუნქტების რიგს მნიშვნელობა არ აქვს. ყველა მნიშვნელოვანია]

  1. ბიზნეს პრაქტიკის და გარემოს სიღრმისეული ცოდნა
    ბიზნეს გეგმას მე-2 კურსელიც დაგიწერს, თუმცა ზედაპირულს. ბიზნესის პრაქტიკული ცოდნა, წლების გამოცდილება, ბიზნეს გარემოს ცოდნა, კავშირები და სხვადასხვა სფეროებში ჩახედულობა (და ბევრი სხვაც) სწორედ ისაა, რომელთა გამოც სპეციალისტი თემას ბოლომდე “გაბურღავს” და ყველა “კენჭს ამოატრიალებს” საიმისოდ, რომ ბიზნეს გეგმაში ინვესტორმა დაინახოს ფული!
  2. პრაქტიკული გამოცდილება იმ სფეროში, რაზედაც გეგმა იწერება
    ან სწრაფად ათვისების უნარი. რა გამოცდილება გაქვთ იმ სფეროში, რაზედაც ადგენთ ბიზნეს გეგმას? დავუშვათ საგრანტო პროექტი გინდათ გააკეთოთ 30 სულიანი ძროხის ფერმის მოწყობაზე. გესმით ეს საქმე? თუ არა, დამერწმუნეთ ისეთ იაღლიშებს დაუშვებთ მსჯელობაში / წერაში / რიცხვებში, რომ არასპეციალისტიც კი აღმოგიჩენთ ლაფსუსებს.
  3. კომუნიკაციის უნარი
    წარმოიდგინეთ ადამიანი, რომელმაც თვითონ არ იცის რა უნდა. ვგულისხმობ ბიზნეს გეგმის მსურველს (10-დან 9 ასეთია). მე უნდა შევძლო და მისი გაურკვეველი, ზოგადი ფრაზებიდან გამოვაკრისტალო კონკრეტული ინფორმაცია, მერე დავალაგო ეს სათანადო წესით ისე, რომ მესამე პირმა (ბანკის ან ფონდის წარმომადგენელმა მაგალითად), რომელიც საკითხში შეიძლება ს ა ე რ თ ო დ ვერ ერკვეოდეს, ნაწერი, ცხრილები და დანართები მარტივად გაიგოს … ეს ნამდვილად არის ნიჭი!
  4. შაბლონი
    შაბლონი არის სტრუქტურა, თუ რა ნაწილებისგან შედგება ბიზნეს გეგმა. ყველა თემას თავისი შაბლონი აქვს. სულ სხვაა შაბლონი მეხორცული მეცხოველეობის ბიზნეს გეგმისთვის, სულ სხვა სასტუმროსთვის და სულ სხვა წარმოებისთვის. სწორი შაბლონით მუშაობა ბევრს ნიშნავს. თან ყველა დაკვეთა ინდივიდუალურია, ამიტომაც შაბლონიც კი მოსარგები შეიძლება გახდეს დამკვეთის სპეციფიკაზე.
  5. კონკრეტულ შეკითხვებზე პასუხის უნარი
    ბიზნეს გეგმის თითოეული განყოფილება რეალურად არის კონკრეტულ შეკითხვებზე კონკრეტული პასუხების და სათანადო თვალსაჩინოებების ერთობლიობა. ადამიანთან 95%-ს კი კონკრეტულ შეკითხვებზე კონკრეტული პასუხების გაცემის უნარი არ აქვს. ადამიანს, რომელსაც ეს უნარი აქვს, უჩემოდ შეუძლია ხელში დაიჭიროს ბიზნეს გეგმის დაწერის ჩემი 35 გვერდიანი შაბლონი, უპასუხოს შეკითხვებს და თავადვე დაწეროს თავისივე ბიზნეს გეგმა ჩემი დახმარების გარეშეც კი.
  6. ტექსტის გამართულად ჩამოყალიბების უნარი (თან კონკრეტულად)
    ზოგი კარგად საუბრობს, მაგრამ ცუდად წერს. ზოგიც კარგად წერს, მაგრამ გირჩევნია ხმა არ ამოიღოს. ბავშვობაში კი ქართულის თემას 99% შპარგალკიდან ვიწერდით :). ხომ ასეა? რაც არ უნდა კარგი აზრები გქონდეთ საჭიროა მათი ფურცელზე გადატანა და ეს უნდა გაკეთდეს გრამატიკულად სწორად, კონკრეტულად, მარტივად და შეიძლება რამდენიმე ენაზეც კი. შეგიძლიათ 30 სიტყვიანი აბზაცის ისე დაწერა, რომ 3 მაინც გრამატიკული შეცდომა არ დაუშვათ? ადამიანთა 80 %-ს არ შეუძლია. აბა სცადეთ და ჩამოაყალიბეთ თქვენი ბიზნეს იდეა 30 სიტყვაში ისე, რომ 4-ე კლასელმა ბავშვმა გაიგოს რაში გააკეთებთ ფულს …
  7. კვლევის და ანალიზის უნარები
    ნებისმიერი რიცხვი, რომელსაც მოიყვანთ ბიზნეს გეგმაში, ანალიზს & კლევას უნდა ეფუძნებოდეს. კვლევის ჩატარება შეგიძლიათ? მონაცემთა ანალიზი შეგიძლიათ? დიახ, ეს სპეციფიკური ცოდნებისა და უნარების ნაკრებია (მეტიც, ცალკე პროფესიაა), რომელსაც წლების მანძილზე სჭირდება გაშარაშინება და დახვეწა. უკაცრავად, დაგუგლვას არ ვგულისხმობ ამ შემთხვევაში (თუმცა ამასაც ცოდნა უნდა).
  8. საბაზო ფინანსური განათლება
    ბიზნეს გეგმა არ არის მხოლოდ მოთხრობა. საჭიროა ფინანსური ინფორმაციის სათანადო ცხრილების შედგენა. შეგიძლიათ ეს? არადა ესენი მარტივი ცხრილებია, რომელთაც ერთხელ თუ კარგად ვინმე აგიხსნით და მას კარგად მოუსმენთ, გაცილებით ადვილდება ამის გაკეთება.
  9. word, excel ცოდნა (power point-იც)
    ვერც კი წარმოიდგენთ რამდენმა არ იცის word და excel. არა, მე არ ვგულისხმობ word და excel ფაილის გახსნას და კლავიატურასთან მუშაობას. მე ვგულისხმობ იმას, რომ ტექსტი ან ცხრილი გააკეთო ისე, რომ ადამიანისთვის მისი ყურება / კითხვა იყოს სასიამოვნო, ანუ ფორმატირებასაც ვგულისხმობ. თუ ვერ ხვდებით რას ვგულისხმობ მაგალითას გეტყვით: წარმოიდგინეთ word -ის ერთი გვერდი, მთლიანი დიდი აბზაცი 10-იანი შრიფტით, არეული სასვენი ნიშნებით. წარმოიდგინეთ? გინდა აგური ჩაგირტყამთ ადამიანისთვის, გინდათ ეს ტექსტი მიგიციათ წასაკითხად.
  10. დრო
    სრულფასოვანი ბიზნეს გეგმა შეიძლება დაწერო 1 კვირაშიც, 2 კვირაშიც და 3 კვირაშიც, ან მოანდომო თვეები. მაღალი კვალიფიკაცია ნიშნავს, რომ უკეთესი ხარისხის პროექტი ნაკლებ დროში შეადგინო. რაც ნაკლებია თქვენი კვალიფიკაცია, მით მეტი დრო დაგეხარჯებათ ბიზნეს გეგმის დაწერაში და მით ზედაპირული იქნება იგი.
  11. კავშირები
    არ არსებობს ადამიანი, რომელმაც ყველაფერი იცის! ყოველთვის საჭიროა შენზე მეტად მცოდნე, ვისაც რჩევას ჰკითხავ. გყავთ ასეთი ადამიანი თქვენთვის საინტერესო სფეროებში?
  12. გვერდში დგომა და დაკვალიანება
    ხელთ გეჭიროს ბიზნეს გეგმა ერთია, მაგრამ შემდეგ იწყება “არდავიწყება”. მაგალითად ბანკში წარდგენა. მზად ხართ გააკეთოთ სათანადო დონის პრეზენტაცია სათანადო ხალხის წინაშე? იქნებ გვერდში მდგომი გჭირდებათ, რომელიც გირჩევთ თუ სად რითი ჯობია მისვლა? შეთავაზება ინვესტორისთვის დაგიწერიათ?

ზემოთ ნახევარ საათში დაწერილი სტატიაა. მეტიც შეიძლებოდა, მაგრამ მგონი მიგახვედრეთ, რომ ბიზნეს გეგმის დაწერა არ არის “ყველის და პურის ჭამა”!

აქვე შეკითხვა:
გაინტერესებთ ისწავლო ბიზნეს გეგმის დაწერა?