ჩვენ ვყიდულობთ საქართველოში წარმოებულ ხარისხიან პროდუქციას. რატომ? 1) გადახდილი ფულით ხელფასს ვუხდით საქართველოს მოქალაქეს, 2) ვავითარებთ ადგილობრივ წარმოებას და 3) ვაძლიერებთ საქართველოს!
საგრანტო პროგრამის გასაუბრება

საგრანტო პროგრამის გასაუბრება: 8 სასარგებლო რჩევა

საგრანტო პროგრამის გასაუბრება მორიგი ბარიერია აწარმოეს მიკროგრანტის მოგების გზაზე. რა მოლოდინიც არ უნდა გქონდეთ ერთი ცალსახაა: ტყუილად 30,000 ლარს არავინ მოგცემთ. ამიტომაც მოემზადეთ “ბაწრის გადაქაჩვის კონკურსისთვის.”

როგორ?

1. ტექნიკური მომზადება

თადარიგი დაიჭირეთ, რომ თქვენს მხარეს ტექნიკა გქონდეთ გამართული: ინტერნეტი, კომპიუტერი, მიკროფონი, ყურსასმენი და ა.შ.

კომპიუტერის გარდა მობილურშიც მოწყობილი გექნეთ Zoom (აუცილებლად დატესტეთ წინასწარ). შუქი თუ გაგეთიშათ, მარტივად გადაერთვებით კომპიუტერიდან მობილურზე.

გასაუბრებისას ჯობია თუ ოთახში მარტო იქნებით.

2. საჭიროა იცოდეთ თქვენი ბიზნესი და თქვენი პროექტი

ზედმიწევნით!

ყველა მასალა ამობეჭდილი გექნეთ ხელთ, რომ უცებ ჩახედოთ რიცხვებში.

წინასწარ ივარჯიშეთ! დაისვით ვინმე კრიტიკული შეკითხვების დამსმელი (ვისაც ესმის თემა) და “გაახედნინეთ” თავი;

3. გასაუბრებისას მოწმდებით თქვენ ცალკე და თქვენს მიერ ბიზნესის გაკეთების თემა ცალკე!

ხვდებით ხომ განსხვავებას?

ასეა, მცირე თემებში ადამიანი / გუნდი არის გადამწყვეტი.

4. აჯობებს გულწრფელად ისაუბროთ

საჭიროა კარგად გესმოდეთ, რომ გასაუბრება გექნებათ სპეციალისტებთან, შეიძლება არა უშუალოდ თქვენი სფეროს კარგად მცოდნე, მაგრამ აზრიან ხალხთან, რომელთაც ვერაფერს გამოაპარებთ.

მნიშნელოვანია გესმოდეთ, რომ მათ დიდი შანსია თქვენი ბიზნეს გეგმა წაკითხულიც კი არ ჰქონდეთ წესიერად. ეცადეთ თავიდანვე იგრძნოთ რა დონეზე არიან ინფორმირებული და სათანადო ტონალობაზე აეწყვეთ.

ყველაზე რთული შემთხვევაა თუ რაღაც აკვიატებული მოსაზრებით “შეიარაღებული” იქნებიან და თავიდანვე თქვენთვის არასწორი მიმართულებიდან დაგისვამენ შეკითხვებს.

თქვენი “მოქნილობა” და იმპროვიზაციის უნარი, ასევე ღიმილი (დიახ, ღიმილი) ერთადერთი გამოსავალი აქ.

5. კონკრეტულ შეკითხვაზე უპასუხეთ კონკრეტული პასუხი

ეს რჩევა ყველა აქ დაწერილ რჩევას შორის ყველაზე მნიშვნელოვანია.

ადამიანების 95% და მეტს ეს უნარი არ აქვს.

ნუ დააღუპინებთ თავს მიდებ-მოდებას. არავინ გთხოვთ ბევრ საუბარს. თქვენ გთხოვენ მოკლე, კონკრეტულ და არგუმენტირებულ პასუხებს.

6. არ მოგერიდოთ შეწინააღმდეგება, თუ საჭიროა “დაჯახებაც”

თქვენი საქმის სპეციალისტი ხართ თქვენ. ამიტომაც არგუმენტებით დაჯახება შეიძლება მოგიწიოთ, ოღონდ რა თქმა უნდა კორექტულობის ფარგლებში, ზედმეტი აგრესიის გარეშე.

მე რომ იმ მხარეს ვიყო, შემოგიგდებდით პროვოკაციულ თემას და შევხედავდი როგორ დაიცავდით თავს.

თუ თქვენ საუბარში თქვენს იდეას / ბიზნესს ვერ იცავთ, თქვენ ბიზნესში ვერ ივარგებთ. ბიზნესი ომია, კარგად გაიაზრეთ ეს!

7. გასაუბრებისას ყველა შეკითხვაზე პასუხი ვერ გექნებათ

და არ ღირს ეცადოთ თითიდან პასუხების გამოწოვას. ამას აჯობებს თქვათ გულწრფელად რა სიტუაცია გაქვთ და თქვათ, რომ ამას მოვაგვარებ ასე, ასე და ასე.

აუცილებლად დადეთ კონკრეტული პასუხი აქ (“წამალი”). ეს მნიშვნელოვანია;

8. პასუხები გაეცით შეძლებისდაგვარად დამაჯერებლად

ოღონდ დამაჯერებლობა ჰაერიდან არ მოფრინდება. მოემზადეთ, მიჰყევით ამ რჩევებთ და მეტი დამაჯერებლობა “ბონუსად” მოჰყვება თითოეული ნაბიჯის გადადგმას.

თითოეული ეს ნიუანსი (და ალბათ ბევრი სხვაც თქვენი რეალობიდან გამომდინარე) მნიშვნელოვანია, რომ თვითდარწმუნების უნარი შეგძინოთ, რაც გასაუბრების დროს გადამწყვეტია!

ბოლო მინიშნება

თუ საგრანტო პროგრამის გასაუბრება ძალიან მალე დასრულდა ორიდან ერთია: ან თქვენი საქმე წასულია, ან თქვენი საქმე აჟურშია!

მიკროგრანტების საგრანტო პროგრამის გასაუბრება ზოგისთვის ჩვეულებრივი კითხვა-პასუხი იქნება, ზოგისთვის ომი. რაც არ უნდა კარგი იდეა გექნეთ, რაც არ უნდა კარგად დაწერილი ბიზნეს გეგმა გეჭიროთ ხელთ, რაც არ უნდა დიდი მიზნები გექნეთ, დამიჯერეთ … თქვენი მთელი ძალისხმევა წყალში ჩაიყრება თუ გასაუბრებაზე ვერ ივარგებთ. წარმატებებს გისურვებთ!