ჩვენ ვყიდულობთ საქართველოში წარმოებულ ხარისხიან პროდუქციას. რატომ? 1) გადახდილი ფულით ხელფასს ვუხდით საქართველოს მოქალაქეს, 2) ვავითარებთ ადგილობრივ წარმოებას და 3) ვაძლიერებთ საქართველოს!
საგრანტო პროგრამის მონიტორინგი

მონიტორინგი დაგინიშნეს? 8 რჩევა მიკროგრანტების ფინალისტებს

მონიტორინგი ბოლო “ბარიერია” აწარმოეს მიკროგრანტის მოგების გზაზე. ოღონდ როგორც გაირკვა მონიტორინგზე ყველასთან არ მიდიან. ვინც საგრანტო პროგრამის გასაუბრება წარმატებით (პირობითად ასე ვთქვათ) გაიარა, მათთან 2021-ის მარტის შუა რიცხვებამდე დარეკავენ, დაგეგმავენ ვიზიტს და გადაამოწმებენ.

ვინც აქამდე მოვიდა, მისთვის მონიტორინგის გავლა სირთულე არ იქნება, მაგრამ ვინაიდან ეს გამოცდილება ბევრს არ აქვს, გადავწყვიტე მოკლე “დამამშვიდებელი” სტატია გავაკეთო ამ თემაზე.

როგორ მოემზადოთ მონიტორინგისთვის?

[გარდა იმისა, რომ ელოდეთ ზარს ნებისმიერ დროს]

1. უმთავრესია, რომ ყველაფერი რასაც მონიტორინგზე მოსულები ნახავენ მაქსიმალურად შეესაბამებოდეს იმას, რაც სადმე დაგიწერიათ ან გიხსენებიათ.

თუ რაღაც გქონდათ დაგეგმილი, მაგრამ გარემოება შეიცვალა (მაგალითად თქვენთვის სასურველი ფართი გაქირავდა), მარტო ახსნა არ გიშველით. ალტერნატივა გქონდეთ მზად (მაგალითად სხვა ფართი). უნდა ჩანდეს, რომ თქვენ გამოსავლის პოვნა შეგიძლიათ.

თუ სადმე რამეში მართალი არ ხართ, ან თუ სადმე მოიტყუეთ, აქ უკვე თქვენი “სიტუაციიდან გამოძრომის” უნარი თუ დაგიცავთ.

2. ნუ ეცდებით მონიტორინგზე მოსულების მოტყუებას ან თუ ეცდებით, დამაჯერებლად მაინც მოიტყუეთ.

საჭიროა კარგად გესმოდეთ, რომ გასაუბრება გექნებათ სპეციალისტებთან, შეიძლება არა უშუალოდ თქვენი სფეროს კარგად მცოდნე, მაგრამ აზრიან ხალხთან, რომელთაც ვერაფერს გამოაპარებთ.

ამიტომ, თავიდანვე აჯობებს გულწრფელად ისაუბროთ.

დამიჯერეთ, გამოცდილ თვალს ვერაფერს გამოაპარებთ. ერთ გკითხავთ და თქვენი სხეულის ენით გავიგებ იმაზე მეტს, ვიდრე თავად წარმოგიდგენიათ.

3. საჭიროა იცოდეთ თქვენი ბიზნესი და თქვენი პროექტი. ზედმიწევნით!

ყველა მასალა ამობეჭდილი გექნეთ ხელთ, რომ უცებ ჩახედოთ რიცხვებში. წარდგენილი იდეა, ბიზნეს გეგმაც. ამობეჭდეთ და წინასწარ ივარჯიშეთ!

ეს მასალა იარაღივითაა … ჯობია თან გქონდეთ და არ დაგჭირდეთ, ვიდრე დაგჭირდეთ და არ გქონდეთ!

მეტიც, დაანახეთ, რომ დროს უქმად არ კარგავთ და ამ ხნის განმავლობაში გარკვეული ნაბიჯები უკვე გადადგით (და საქმე წინ წაიგდეთ).

4. ემზადეთ უარესისთვის!

ყველაზე რთული შემთხვევაა თუ რაღაც აკვიატებული მოსაზრებით “შეიარაღებული” ადამიანები მოვლენ მონიტორინგზე და თავიდანვე თქვენთვის არასწორი მიმართულებიდან დაგისვამენ შეკითხვებს.

თქვენი “მოქნილობა” და იმპროვიზაციის უნარი, ასევე ღიმილი (დიახ, ღიმილი) ერთადერთი გამოსავალი აქ.

5. კონკრეტულ შეკითხვაზე უპასუხეთ კონკრეტული პასუხი.

ადამიანების 95% და მეტს ეს უნარი არ აქვს. თქვენ მაინც ნუ დააღუპინებთ თავს “მიდებ-მოდებას”. არავინ გთხოვთ ბევრ საუბარს.

თუ საჭიროა ნუ მოერიდებით კამათსაც. თქვენი საქმის სპეციალისტი ხართ თქვენ. ამიტომაც არგუმენტებით დაჯახება შეიძლება მოგიწიოთ, ოღონდ რა თქმა უნდა კორექტულობის ფარგლებში. დაიცავით საკუთარი აზრი და პოზიცია.

6. ყველა შეკითხვაზე პასუხი ვერ გექნებათ, ამიტომაც არ ღირს ეცადოთ თითიდან პასუხების გამოწოვას.

აჯობებს თქვათ გულწრფელად რა სიტუაცია გაქვთ და თქვათ, რომ ამას მოვაგვარებ ასე, ასე და ასე.

აუცილებლად დადეთ / აჩვენეთ კონკრეტული პასუხი / “წამალი”. ეს მნიშვნელოვანია.

7. მონიტორინგი მორიგი “ტესტიაა”. პასუხები გაეცით შეძლებისდაგვარად დამაჯერებლად.

ცხადია ინერვიულებთ, თუმცა მოემზადეთ, მიჰყევით ამ რჩევებს და მეტი დამაჯერებლობა “ბონუსად” მოჰყვება თითოეული ნაბიჯის გადადგმას.

8. მოემზადეთ რიგიანად და ყველაფერი იქნება რიგზე!

მონიტორინგი ბოლო ეტაპია. აქამდე რახან მოხვედით, ე.ი. გამარჯვების ძალიან დიდი შანსი გაქვთ.

წარმატებებს გისურვებთ!